Кыргыз Республикасынын Министрлер Кабинетине караштуу Мамлекеттик бажы кызматынын капитаны Адилет Тилебалдиев Бишкек шаарында өткөн пауэрлифтинг боюнча Азия чемпионатында Кыргызстандын намысын татыктуу коргоп, зор жетишкендикке жетишти.

Ал WPSO “Орус жим” (Русский жим) дисциплинасында 55 кг салмактан 75 кг чейин салмак категориясында күч сынашып, мыкты жыйынтык көрсөттү — 51 жолу кайталап, өз категориясында 1-орунду ээлеп, спорттун чебери наамына ээ болду. Спортчунун салмагы — 72,1 кг, көрсөткүчүнүн коэффициенти — 1990,00725.  

Жакшы даярдыгынын жана мүнөзүнүн бекемдигинин аркасында Адилет Тилебалдиев өзүнүн спортчу катары да, бажы кызматынын офицери катары да жогорку деңгээлде экенин тастыктады. Ал өз кызматын жоопкерчилик менен аткарып, ведомствонун спорттук жана коомдук иш-чараларына активдүү катышып келет.

Мамлекеттик бажы кызматы капитан Адилет Тилебалдиевди ийгиликтүү көрсөткүчү менен чын дилинен куттуктайт жана жаңы жетишкендиктерди каалайт!