Кыргыз Республикасынын Финансы министрлигине караштуу Мамлекеттик бажы кызматы жеңил автоунаалар үчүн белгиленген бажы алымдарынын жана салыктарынын ченемдери өзгөрбөгөнүн билдирет.

  Үчүнчү өлкөлөрдөн товарларды Кыргыз Республикасынын бажы аймагына ташып келүүдө Евразия экономикалык бирлигинин Бажы кодексинин 46-беренесинин 1-пунктуна ылайык төмөнкүдөй бажы алымдары төлөнөт:

- товарларды чыгарууга байланышкан аракеттер үчүн товарлардын бажы наркынын 0,40% өлчөмүндө бажы алымы;

- ЕЭК Кеңешинин чечими менен бекитилген ЕАЭБдин Бирдиктүү бажы тарифинде белгиленген ченемдер боюнча ташып келүү бажы алымы;

- 12% кошумча нарк салыгы

  Импорттук бажы алымынын ченеминин өлчөмү төмөнкү критерийлердин негизинде ТЭИ ТН кодун туура аныктоодон көз каранды: транспорт каражатын чыгаруу убактысы, кыймылдаткычынын түрү, кыймылдаткычынын көлөмү.

  Мисалы, Бирдиктүү бажы тарифине ылайык, жаңы жеңил автоунаалар үчүн 15%, ал эми мурда колдонулган унаалар үчүн 20% бажы алымынын ченеми белгиленген. Белгиленген импорттук бажы алымдарынын ченемдери ЕАЭБге кирген беш мамлекет үчүн бирдей жана Кыргыз Республикасы аларды бир тараптуу өзгөртө албайт.

  Кыргыз Республикасынын ченемдик укуктук актыларына, белгиленген бажы алымдарынын жана КНСтин ченемдерине өзгөртүүлөрдү киргизүү үчүн тиешелүү ченемдик укуктук актыны иштеп чыгуу зарыл, ал жактыруудан жана коомдук талкуудан өтүүгө тийиш.

  Белгилей кетсек, экономикалык коопсуздукту коргоо максатында бажы кызматы товарлардын бажы наркын контролдойт, бул бажы төлөмдөрүн алуунун толуктугуна түздөн-түз таасирин тийгизет. Товарлардын бажы наркы Евразия экономикалык бирлигинин Бажы кодексинин 5-главасына ылайык аныкталат, анда бажы наркын аныктоонун ар бир ыкмасын колдонуунун шарттары белгиленет.