Кыргызстанга жарандар бажы алымын төлөбөстөн алып кире ала турган кошумча 10 миң электромобилге квота берилди.
Ушуну менен 2026-жылга карата электромобилдерге берилген жалпы квота 15 миңден 25 миңге чейин көбөйтүлдү.

Тиешелүү чечим 2026-жылдын 9-июлунда Евразия экономикалык комиссиясынын Кеңешинин №79 чечими менен кабыл алынган. Ал 2026-жылдын 17-августунан тартып күчүнө кирет.

Тарифтик жеңилдик Кыргыз Республикасына алып келинүүчү «таза» электромобилдерге (ТЭИ ТН ЕАЭБдин 8703 80 000 3 коду) жана ырааттуу гибриддерге (ТЭИ ТН ЕАЭБдин 8703 80 000 5 коду) жайылтылат.
Жеңилдикти Кыргызстанда туруктуу жашаган Кыргыз Республикасынын жарандары пайдалана алышат.

Квотанын көбөйтүлүшү жарандарга электромобилдерди кыйла жеткиликтүү шарттарда сатып алууга мүмкүнчүлүк түзүп, Кыргызстанда экологиялык таза транспортту өнүктүрүүгө өбөлгө түзөт.