Кыргыз Республикасынын Министрлер Кабинетинин тескемеси менен Мамлекеттик бажы кызматынын алдындагы «Тышкы соода чөйрөсүндөгү “Бирдиктүү терезе” борбору» мамлекеттик ишканасынын директору болуп Асанов Тилек Турусбекович дайындалды.

Эскерте кетсек, Министрлер Кабинетинин 2025-жылдын 12-июнундагы №334 токтому менен «Тышкы соода чөйрөсүндөгү “Бирдиктүү терезе” борбору» мамлекеттик ишканасы Мамлекеттик бажы кызматынын карамагына өткөрүлгөн.

Бул чечимди кабыл алууда өлкө жетекчилиги Кытай Эл Республикасы, Казакстан Республикасы, Тажикстан Республикасы, Өзбекстан Республикасы, Армения Республикасы, Азербайжан Республикасы жана Грузия сыяктуу өлкөлөрдүн “бирдиктүү терезе” маалыматтык системаларын ишке киргизүү боюнча эл аралык тажрыйбаларына таянган.

Аталган токтом тышкы экономикалык ишмердиктин катышуучулар үчүн уруксат берүүчү документтерди алуу жана берүү жол-жоболорун жөнөкөйлөтүүгө, ошондой эле Кыргыз Республикасынын Президентинин 2025-жылдын 10-мартындагы №83 “Кыргыз Республикасынын мамлекеттик кызмат системасынын натыйжалуулугун жогорулатууга жана бюрократияны кыскартууга кошумча чаралар жөнүндө” Жарлыгын ишке ашырууга багытталган.

Мунун негизги максаты -  санариптик трансформациянын алкагында жарандар жана бизнес үчүн мамлекеттик органдар жана жергиликтүү өз алдынча башкаруу органдары менен өз ара аракеттенүүдө мүмкүн болушунча ыңгайлуу жана ачык шарттарды түзүү болуп саналат.